Ti langit kagenep teras Kanjeng Nabi naek ka langit katujuh.
Teras Malaikat Jibril nyuhunkeun dibukakeun lawang langit.
Teras aya anu naros: "Saha ieu teh?".
Diwaler ku Malaikat Jibril: "Kami Jibril!".
Teras ditaros deui: "Sareng saha anjeun teh?".
"Sareng tuan Muhammad", saur Malaikat Jibril.
"Naha parantos diutus ajeuna teh?", saur nu naros.
"Atuh puguh atos mah", saur Jibril deui.
Teras anu naros teh ngadawuh: "Bagea sumping di tempat lega sareng ahli. Mudah-mudahan Alloh manjangkeun yuswa ieu ki dulur anu jadi gaganti. Saenya-enyana ari Muhammad eta pangsaena dulur sareng pangsae-saena gaganti sarta pangsae-saena anu sumping".
Teras dibuka lawang langit ka Malaikat Jibril sareng ka Kanjeng Nabi saw.
Samangsa-mangsa Nabi saw ucul-ucul, anjeuna kaget wirehna pendak sareng Kanjeng Nabi Ibrohim "Kholillulloh" as.
Anjeuna nuju calik di lawang sorga dina korsi tina emas. Anjeuna nyarandekeun tonggongna kana Baetul Ma'mur, sarta ngiring ka anjeuna sagolongan ti kaomna.
Mangka uluk salam Kanjeng Nabi ka anjena sarta diwaler ku Nabi Ibrohim as kana eta salam.
Ngadawuh Nabi Ibrohim as: "Bagea sumping heh putra anu sholeh sarta nabi anu sholeh".
Teras ngadawuh deui Nabi Ibrohim as: "Parentah ku anjeun umat anjeun kudu ngalobakeun melak tina pepelakan sorga. Saenya-enyana, tanah sorga eta lendo, sareng jagatna lega".
Lajeng ngadawuh Kanjeng Nabi saw: "Naon ari pepelakan sorga teh?".
Mangka ngadawuh Nabi Ibrohim as: "Nyaeta laa haula wa laa quwwata illa billahil 'aliyil 'Adziim".
Dina sapalihna riwayat disaurkeun: "Tepikeun ka umat anjeun ti kaula kana salam, sareng wartoskeun ka maranehna saenyana sorga eta lendo
tanahna tawar, seger caina. Saenyana pepelakannana teh: subhanallooh wal hamdulillaahh wa laa ilaahha illalloohhu alloohhu akbar".
Di caketeun Nabi Ibrohhm as aya kaom anu nuju caralik. Pameunteunna barodas sapertos sapirang-pirang keretas.
Sareng salian ti eta aya deui sagolongan kaom anu dina rupana teh kalalotor.
Teras eta kaum anu rupana kalalotor teh jung nangtung tarurun ka bangawan, teras marandi. Nalika maranehna haranjat ti eta bangawan katingal rupana teh bersih kokotorna sakedik.
Teras tarurun deui kana bangawan anu kadua, tuluy marandi deui di eta bangawan. Nalika haranjat, katingal rupana tambah bersih tina kokotorna.
Teras tarurun deui kana bangawan anu katilu, tuluy marandi deui di eta bangawan. Nalika haranjat, katingal rupana tambah bersih dongkap saperti
rupa baturna, sarta nyalampeurkeun dariuk jeung baturna.
Lajeng ngadawuh Kanjeng Nabi saw: "Heh Jibril, saha eta anu barodas sareng anu dina rupana aya kacacadan teh? Sareng ari eta bangawan-bangawan naon anu dipake mandi teh?".
Diwaler ku Malaikat Jibril: "Ari eta kaom anu rupana barodas teh kaom anu henteu nyampurkeun iman ku dosana. Anapon kaom anu dina wajah-wajahna aya kokotor, eta teh kaom anu nyampurkeun amal sholeh sareng kagorengan teras tarobat, teras ku Gusti Allah ditampi tobat-tobatna. Anapon ari bangawan anu kahiji tinu nu tilu nyaeta Rohmat Alloh. Ari anu kadua nyaeta Ni'mat Alloh. Ari anu katilu nyaeta inuman anu bersih anu dipaparinkeun ka maranehna".
-
